• Ստանիսլավ Զասն այս ամիս կայցելի Հայաստան

    Փետրվարի 26-28-ը Հավաքական անվտանգության համաձայնագրի կազմակերպության գլխավոր քարտուղար Ստանիսլավ Զասը կայցելի Հայաստանի Հանրապետություն: Այցի ընթացքում նախատեսվում է հանդիպում ՀՀ վարչապետ Նիկոլ Փաշինյանի հետ: Նախատեսվում է նաև, որ ՀԱՊԿ գլխավոր քարտուղարը բանակցություններ կվարի արտաքին գործերի նախարար Զոհրաբ Մնացականյանի, պաշտպանության նախարար Դավիթ Տոնոյանի, ԱԱԽ քարտուղար Արմեն Գրիգորյանի և Ազգային ժողովի նախագահ Արարատ Միրզոյանի հետ: Որպես ՀԱՊԿ-ի գլխավոր քարտուղար՝ սա Ստանիսլավ Զասի առաջին այցն է Հայաստան:

  • Էդմոն Մարուքյանին սպառնալու փաստով հարուցվել է քրեական գործ

    «Լուսավոր Հայաստան» խմբակցության ղեկավար Էդմոն Մարուքյանի հասցեին սպառնալիքներ հնչեցնելու փաստով հարուցվել է քրեական գործ՝ ՀՀ Քրեական օրենսգրքի 137-րդ հոդվածի 1-ին մասի հատկանիշներով, այն է՝ սպանության, առողջությանը ծանր վնաս պատճառելու կամ խոշոր չափի գույք ոչնչացնելու սպառնալիքը, եթե այդ սպառնալիքն իրականացնելու վտանգ է եղել։ Այս մասին «Փաստինֆո»-ին հայտնեց ՀՀ գլխավոր դատախազության հանրային կապերի բաժնի պետ Արևիկ Խաչատրյանը։ Հիշեցնենք, որ փետրվարի 11-ին խորհրդարանում հրավիրված ասուլիսին Էդմոն Մարուքյանը հայտարարել էր իր հասցեին սպառնալիքներ հնչեցնելու մասին։ «Զգուշացնում եմ, այ գյադա, շուտով գնդակները որոտալու են, նայի չդիպչի…»,- ասել էր Մարուքայնը՝ սպառնալիքներից հատված հրապարակելով։ Իրեն ուղղված սպառնալիքների վերաբերյալ Մարուքյանը գրավոր դիմել էր գլխավոր դատախազին։ Դատախազությունը Էդմոն Մարուքյանի գրությունն ուղարկել էր ոստիկանության 6-րդ վարչություն՝ որպես հանցագործության մասին հաղորդում։

  • Վաղը ամբողջ օրը սպասվում է բուք, ձյուն և ձնախառն անձրև

    Արտակարգ իրավիճակների նախարարությունը տեղեկացնում է, որ փետրվարի 24-ի ժամը 21:10-ի դրությամբ ՀՀ տարածքում ավտոճանապարհները հիմնականում անցանելի են: Արագածոտնի մարզի Ամբերդ ամրոց և Քարի լիճ տանող ավտոճանապարհները դեռ անորոշ ժամանակ փակ կլինեն: Փետրվարի 25-ի ամբողջ օրը հյուսիսային շրջաններում սպասվում է բուք, հատկապես լեռնային գոտիներում, և տեղումներ՝ ձյան և ձնախառն անձրևի տեսքով: Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար: Վարորդներին խորհուրդ է տրվում երթևեկել բացառապես ձմեռային անվադողերով։

  • Հանձնաժողովը քննարկել է ՀԸԳՀ ճանապարհային քարտեզի 2020թ. միջոցառումների իրականացման ընթացքը

    Փոխվարչապետ Մհեր Գրիգորյանի նախագահությամբ կայացել է ՀՀ-ԵՄ Համապարփակ և ընդլայնված գործընկերության համաձայնագրի և ՀՀ-ԵՄ Գործընկերության առաջնայնություններ փաստաթղթի կիրարկումն ապահովող միջոցառումները համակարգող միջգերատեսչական հանձնաժողովի հերթական նիստը: Օրակարգի առաջին հարցը զեկուցել է արտաքին գործերի նախարարի տեղակալ Ավետ Ադոնցը, ով ներկայացրել 2019 թվականի դեկտեմբերի 16-ին Բրյուսելում կայացած ՀՀ-ԵՄ Համապարփակ և ընդլայնված գործընկերության համաձայնագրի ներքո ստեղծված ՀՀ-ԵՄ Գործընկերության կոմիտեի 2-րդ նիստի արդյունքները և առանձին հարցերի վերաբերյալ երկու կողմերի դիրքորոշումներն ու առաջարկությունները: Այնուհետև շրջակա միջավայրի նախարարի ու տարածքային կառավարման և ենթակառուցվածքների նախարարի տեղակալները զեկուցել են ՀԸԳՀ-ի կիրարկման ճանապարհային քարտեզով 2020 թվականի համար նախատեսված միջոցառումների իրականացմանն ուղղված աշխատանքները: Մասնավորապես, անդրադարձ է կատարվել շրջակա միջավայրին, կլիմային և տրանսպորտին վերաբերող դրույթներին: Փոխվարչապետը, ամփոփելով նիստը, շնորհակալություն է հայտնել պատգամավորներին հանձնաժողովին նիստերին ակտիվ մասնակցություն ցուցաբերելու համար և հանձնարարել է բոլոր շահագրգիռ մարմիններին համագործակցելով առաջ շարժվել ճանապարհային քարտեզում նշված միջոցառումների իրականացման գործընթացում՝ դրանց համընդգրկուն բնույթ հաղորդելու և պատշաճ ժամանակին կիրարկելու նպատակով:

  • Որո՞նք են «Մյունխենյան սկզբունքները». հարց ԱԳ նախարարին

    ՀՀ ԱԳ նախարար Զոհրաբ Մնացականյանը փետրվարի 24-ին լրագրողների հետ հանդիպմանն անդրադարձավ ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի բանավեճին ու դրա հետ կապված քննադատություններին: Նախարարին խնդրեցին գնահատել այդ հանդիպման արդյունքները և մեկնաբանել՝ ինչ ասել է «Մյունխենյան սկզբունքներ», արդյո՞ք դրանք փաստաթղթի տեսք ստացել են, և արդյո՞ք նախկին սկզբունքները չեղարկվել են: «Դրանք ավելի համապարփակ կերպով արտահայտում են այն, ինչի մասին խոսվեց Մյունխենում, այնտեղ չի արտահայտվել որևէ բան, որը վերաձևավորում է մեր ձևավորված մոտեցումները ԼՂ հակամարտության կարգավորման ընդհանուր փաթեթի մեջ: Արդյո՞ք կարգավիճակի հարցն անտեսվում է. ո´չ, չի անտեսվում, չի կարող անտեսվել, անտրամաբանական է նման կերպ գնահատել, մեր դիրքորոշումը մնում է կայուն: Մյունխենյան սկզբունքները համալրում են այն մոտեցումները, որ կայուն են ու ունեն իրենց արտահայտությունը բոլոր հնարավոր ձևաչափերով, Հայաստանը եղել և մնում է խստորեն հավատարիմ հարցի խաղաղ կարգավորմանը Մինսկի խմբի համանախագահության շրջանակներում, և այդ շրջանակներում շարունակելու ենք աշխատել այնպիսի լուծումների համար, որ արտահայտված են նաև Մյունխենյան սկզբունքներում»,- ասաց նախարարը: Հանդիպման արդյունքներին անդրադառնալով՝ Մնացականյանը նշեց, որ ղեկավարներն են գնահատել՝ ինչպես կուզեն ներգրավվել այս ձևաչափի մեջ, սակայն երևույթը դրական է, որ կարող են նստել և բաց զրույցով ղեկավարների մակարդակով քննարկել հարցեր: «Դա նշանակություն ունի մեր աշխատանքի այն կարևոր ուղղության մեջ, որ վերաբերում է միջավայրի ձևավորմանը, որտեղ անցյալ տարի ունեցել ենք որոշ համեստ արդյունք, որը լրագրողների փոխանակման ծրագիրն էր: Դա մեզ հիմք տալիս է ենթադրելու, որ կարող ենք շարունակել այս ուղղությամբ աշխատել, ինչ վերաբերում է ղեկավարներին, կարծում եմ՝ այն փաստը, որ ղեկավարները միասին բաց ֆորմատում կարող են նստել և առնչվել միմյանց, լավ օրինակ է, այստեղ կա որոշ մտահոգիչ խնդիր, որ վերաբերում է գուցե մեր համակարգերի տարբերությանը: Այն մեկնաբանությունները, որ տեսա ադրբեջանական մամուլում կամ տարբեր պաշտոնյաների կողմից, որոնք պրոպագանդիստական ծայրահեղ մակարդակի են հասցված, որ հիշեցնում էին մոդելներ, որ ժողովրդավարական կամ ազատ քննարկման համակարգի բացակայության արտահայտություն են, դրանք, մեղմ ասած օգտակար չեն, ավելի պարզ ասած՝ անընդունելի են»,- նշեց նա: Մնացականյանն ընդգծեց՝ ուրախ է, որ հայ հասարակության մեջ կա շատ ավելի բաց քննարկում, որում կարող են գնահատել այս կամ այն իրադարձությունը կամ զարգացումը:

  • Սկսվում է քաղաքական պայքարի նոր փուլ. Ռոբերտ Քոչարյան

    Այսօր կայացել է նախագահ Ռոբերտ Քոչարյանի աջակիցների հավաքը, որի ընթացքում նրա որդին՝ Լևոն Քոչարյանը, ընթերցել է նախագահի ուղերձը՝ ուղղված իր աջակիցներին: Այս մասին տեղեկացնում է երկրորդ նախագահի կայքը: Ուղերձում, մասնավորապես, ասված է. «Հարգելի՛ բարեկամներ Ողջունում եմ ձեզ և այսօրվա միջոցառումը: Ուզում եմ նախ և առաջ իմ երախտագիտությունը հայտնել ձեզ՝ ձեր հստակ դիրքորոշման, քաղաքացիական քաջության ու պարզ բառով ասած՝ տղամարդկության համար։ Շնորհակալ եմ ձեզ։ Դուք և ձեր նման մարդիկ են, որ կերտել են Հայաստանի ու Արցախի նորագույն ու հերոսական պատմությունը, իրենց քաջության ու սկզբունքայնության շնորհիվ։ Ընդամենը մեկ տարի առաջ հնարավոր չէր նույնիսկ ենթադրել, որ մեր երկրում նորից քաղաքական իմաստ ու արդիականություն կստանա «Միացիր» կոչը։ Եթե 3 տասնամյակ առաջ այն կոչ էր հայ ժողովրդի երկու բաժանված հատվածների միացման, ապա այսօր այդ կոչը միավորում է ապազգայնության, իրավական բեսպրեդելի, պատմության նենգափոխման ու անձնիշխանության դեմ պայքարողներին։ Ցավում եմ, որ այսպիսի զուգահեռ կա, սակայն դա է ճշմարտությունը։ Ուզում եմ այսօր, օգտվելով առիթից, իմ երախտագիտությունը հայտնել նաև բոլոր նրանց, ովքեր ստորագրել են հայտնի «հարյուրի հայտարարությունը»։ Տասնյակ հազարավոր մարդկանց մասնակցությունը պարտավորեցնող է և ստիպում է ինձ պայքարել կրկնակի եռանդով և չընկրկել որևէ դժվարության առաջ։ Ուզում եմ իմանաք. բանտախուցը ընկալում եմ որպես աշխատասենյակ, որտեղ աշխատում եմ՝ հանուն Հայաստանի լավ ապագայի։ Այն ապագայի, որտեղ կհարգվեն մեր ազգային արժեքները, մեր ինքնությունը, ուր մենք կապրենք առանց կեղծիքի ու ստի, անամոթ պոպուլիզմի, կապրենք արժանապատիվ կյանքով։ Կզարգանանք՝ չզիջելով մեր ամենամեծ ու նշանակալի ազգային նվաճումը՝ մեր Հաղթանակը։ Սիրելի բարեկամներ Վստահ եմ, որ նորաստեղծ Ազատության հանձնախումբը կարող է դառնալ այն կառույցը, որը կմիավորի ոչ թե մեկ մարդու ազատության համար պայքարող մարդկանց, այլ բոլոր նրանց, ում համար թանկ է Հայաստանի և Արցախի ապահով ու բարեկեցիկ ապագան։ Սկսվում է քաղաքական պայքարի նոր փուլ, և ես հաջողություն եմ մաղթում բոլորիս այդ պայքարում։ Համոզված եմ, որ ամեն ինչ լավ է լինելու»:

  • Արմեն Սարգսյանը հանդիպել է ԱԺ նախագահ Արարատ Միրզոյանի հետ

    Հանրապետության նախագահ Արմեն Սարգսյանն այսօր հանդիպում է ունեցել ՀՀ Ազգային ժողովի նախագահ Արարատ Միրզոյանի հետ: Նախագահ Սարգսյանն ու ԱԺ նախագահը քննարկել են նախագահական և խորհրդարանական ինստիտուտների միջև առավել սերտ համագործակցության հաստատմանը վերաբերող հարցեր: Զրուցակիցներն անդրադարձել են նաև տարվա ընթացքում խորհրդարանի օրենսդրական գործունեությանը, ինչպես նաև խորհրդարանական դիվանագիտության դերին: Նախագահ Սարգսյանը տեղեկություններ է ներկայացրել նաև նախագահական մի շարք նախաձեռնությունների և գալիք տարի Հայաստանում նախատեսվող միջազգային խոշոր միջոցառումների մասին՝ կարևորելով բոլոր այս նախաձեռնություններում խորհրդարանի ակտիվ ներգրավվածությունը։

  • Ողբերգական դեպք Լոռու մարզում. բնակարանում հայտնաբերվել են ամուսինների և նրանց երեխաների դիերը

    Քիչ առաջ դաժան ու ողբերգական դեպք է տեղի ունեցել Լոռու մարզում։ Shamshyan.com-ի հաղորդմամբ՝ ժամը 13:20-ի սահմաններում ոստիկանության Թումանյանի բաժին ահազանգ է ստացվել քաղաքացիների կողմից, որ Ալավերդի քաղաքի 2-րդ զանգվածի 2-րդ շենքի բնակարաններից մեկի տան դուռը բացելով, ներսում հայտնաբերել են ընտանիքի անդամների դիերը: Ոստիկաններն ու քննիչները տան հյուրասենյակում՝ հատակին, հայտնաբերել են ամուսինների և երեխաներից մեկի, իսկ ննջասենյակում՝ մյուս երեխայի դիերը: Թե ինչն է եղել ընտանիքի անդամների մահվան պատճառը, պարզ կլինի մի շարք փորձաքննություններ նշանակելուց հետո: Ոստիկանությունն ու քննչական բաժինը պարզում են մահացածների ինքնությունն ու դեպքի հանգամանքները:

  • Հայաստանի հետ սահմանի ճշգրտման հարցը պետք է լուծվի. Վրաստանի նախագահ

    Վրաստանի նախագահ Սալոմե Զուրաբիշվիլին հայտարարել է, որ իր երկիրը պետք է Հայաստանի ու Ադրբեջանի հետ սահմանային հարցերը լուծի, հստակեցնի սահմանները, որ կայանա իբրև պետություն: Այս մասին հայտնում է Rusarminfo-ն: Զուրաբիշվիլին հիշեցրել է սահմանային այն հատվածների մասին, որոնց հարցում Հայաստանի ու Ադրբեջանի հետ համաձայնություն չկա՝ նշելով, որ սահմանազատման գործընթացն ընդհատվել է: «Անհասկանալի է, թե ինչու պետք է այդ գործընթացը չավարտենք մեր բարեկամ երկրների հետ: Մեր հանձնաժողովները պետք է սկսեն աշխատել այդ ուղղությամբ»,- ասել է Վրաստանի նախագահը: Զուրաբիշվիլին հավելել է, որ այդ գործընթացի արդյունքը կլինի համաձայնեցված սահմանը, և սա Վրաստանի համար պարտադիր փուլ է:

  • «Կենտրոն» ՀԸ-ի լրագրողի մասնագիտական գործունեությունը խոչընդոտելու դեպքի առթիվ հարուցվել է քրգործ

    «Կենտրոն» հեռուստաընկերության լրագրողի և օպերատորի մասնագիտական օրինական գործունեությունը խոչընդոտելու, նրանց քաշքշելու, տեսանկարահանման իրականացմանը խանգարելու, տեսախցիկի լուսավորության սարքավորումը վնասելու դեպքի առթիվ քրեական գործ է հարուցվել: Այս մասին ֆեյսբուքյան իր էջում գրառում է կատարել ՀՀ գլխավոր դատախազի խորհրդական Գոռ Աբրահամյանը: ««Կենտրոն» հեռուստաընկերության «Էպիկենտրոն» լրատվական ծրագրի լրագրող Արթուր Հակոբյանի կողմից տրված հաղորդման հիման վրա ՀՀ ոստիկանության Մասիսի բաժնում նախապատրաստված նյութերով 2019 թ. դեկտեմբերի 24-ին Արարատի մարզի Հովտաշատ գյուղի ձկնաբուծարանում ծավալվող իրադարձությունները նկարահանելիս և լուսաբանելիս անծանոթ անձանց կողմից նրա և նույն հեռուստաընկերության օպերատոր Սիմիկ Մայիլյանի լրագրողի մասնագիտական օրինական գործունեությանը խոչընդոտելու, նրանց քաշքշելու, տեսանկարահանման իրականացմանը խանգարելու, տեսախցիկի լուսավորության սարքավորումը վնասելու դեպքի առթիվ, ՀՀ Արարատի մարզի դատախազի հանձնարարությամբ ՀՀ Քրեական օրենսգրքի 164-րդ հոդվածի 1-ին մասի հատկանիշներով հարուցվել է քրեական գործ»,- գրել է Գոռ Աբրահամյանը:

  • Երեխաները ունեն մեծ ապագա և մեր բոլորի ուշադրության կարիքը. Արմեն Սարգսյան

    ՀՀ նախագահ Արմեն Սարգսյանը Instagram-ում երեխաների հետ լուսանկար է հրապարակել, որին կից գրել է. «Բոլոր երեխաները տաղանդավոր են, նրանք մեծ ապագա ունեն և մեր բոլորի ուշադրության կարիքը»:

  • 80 մլն դրամի խախտումներ Վայքի համայնքապետարանում

    ՀՀ պետական վերահսկողական ծառայությունը Վայոց ձորի մարզի Վայքի համայնքապետարանում իրականացրել է ուսումնասիրություն և մշտադիտարկում պետական միջոց տրամադրելու համար հիմք հանդիսացող տեղեկատվության արժանահավատության և գնումների գործընթացը կանոնակարգող օրենսդրության պահանջների պահպանման նկատմամբ: Արդյունքում արձանագրվել են 80 մլն դրամի տարբեր բնույթի խախտումներ և թերություններ։ Մասնավորապես՝ 2016-2019թթ. ընթացքում համայնքապետարանի կողմից հարկերի և տուրքերի հավաքագրման գործընթացում արձանագրվել են չգանձված (չհավաքագրված) կամ պակաս գանձված հարկեր և տուրքեր։ Համայնքապետարանի կողմից 2016-2019թթ. ընթացքում օտարված որոշ հողատարածքների և գույքի աճուրդներին այլ մասնակիցների առկայությունը կրել է ձևական բնույթ: Տրանսպորտային միջոցի վարձակալության պայմանագրի շրջանակներում ՀՀ պետական բյուջե պակաս է վճարվել եկամտային հարկի գումար: 2017-2018թթ. ընթացքում համայնքապետարանի կողմից ձեռք բերված ավտոպահեստամասերի ծախսման ճշտության ուսումնասիրությամբ արձանագրվել են չհիմնավորված ծախսեր: Համայնքապետարանի և ՀՈԱԿ-ների մի շարք աշխատակիցներ բացակայել են Հայաստանի Հանրապետությունից, սակայն այդ ընթացքում նրանց համար հաշվարկվել և վճարվել են աշխատավարձեր։ 2016-2019թթ. համայնքապետարանի, ինչպես նաև իրականացված այլ ծրագրի շրջանակներում շինարարական աշխատանքների ուսումնասիրություններով արձանագրվել են փաստացի պակաս կատարված շինարարական-վերանորոգման աշխատանքներ: Համայնքապետարանն իր կարիքների համար 2016-2019թթ. ընթացքում կազմակերպել է գնման ընթացակարգեր՝ խախտելով գնումների մասին ՀՀ օրենսդրության պահանջները: Կազմված տեղեկանքն ուղարկվել է ՀՀ գլխավոր դատախազություն:

  • Զոհրաբ Մնացականյանը մասնակցեց Արևելյան գործընկերության ԱԳ նախարարների հանդիպմանը

    ԵԱՀԿ 26-րդ նախարարական խորհրդաժողովի շրջանակներում ԱԳ նախարար Զոհրաբ Մնացականյանը դեկտեմբերի 4-ին Բրատիսլավայում մասնակցեց Եվրոպական միության արտաքին գործերի և անվտանգության քաղաքականության հարցերով նորանշանակ բարձր ներկայացուցիչ, Եվրոպական հանձնաժողովի փոխնախագահ Ջոզեֆ Բորելի և ԵՄ Արևելյան գործընկերության մասնակից պետությունների ԱԳ նախարարների հանդիպմանը: Հայաստանի արտաքին քաղաքական գերատեսչության ղեկավարը շնորհավորեց Ջոզեֆ Բորելին պատասխանատու պաշտոնում նշանակվելու և Կազմակերպության կարևոր ուղղությունների համակարգման ղեկը ստանձնելու կապակցությամբ՝ հաջողություն մաղթելով այդ կարևոր առաքելությունում: Հայաստանի ԱԳ նախարարը, կարևորելով Արևելյան գործընկերության ծրագրի նախաձեռնությունը՝ որպես ԵՄ հետ երկկողմ համագործակցության զարգացման կարևոր հարթակ, որը ժողովրդավարության և մարդու իրավունքների արժեքների վրա խարսխված փոխգործակցությունն է ձևավորել եվրոպական գործընկերների միջև: Զոհրաբ Մնացականյանը ներկայացրեց ժողովրդի լայն մանդատի հիման վրա կառավարության կողմից իրականացվող լայնամասշտաբ բարեփոխումների ընթացքն՝ ուղղված երկրում իրավունքի գերակայության, մարդու իրավունքների, ժողովրդավարության ամրապնդմանը և կայուն զարգացմանը, դատաիրավական համակարգում բարեփոխումների իրականացմանը։ Հայաստանը վերահաստատեց իր պատրաստակամությունը՝ շարունակելու գործնական քայլեր ձեռնարկել ԵՄ հետ փոխադարձ հարգանքի և շահերի վրա հիմնված հարաբերությունների զարգացման ուղղությամբ: Այդ համատեքստում ընդգծվեց Հայաստան-Եվրոպական միություն երկկողմ համագործակցության ոլորտը կարգավորող իրավական հենքի՝ Համապարփակ և ընդլայնված գործընկերության համաձայնագրի կիրարկման կարևորությունը և մուտքի արտոնագրերի ազատականացման երկխոսության մեկնարկի էական նշանակությունը: Հանդիպման մասնակիցները մտքեր փոխանակեցին Արևելյան գործընկերության ապագայի տեսլականի շուրջ:

  • Համայնքների խոշորացման որևէ հաջողված պատմություն այդպես էլ չներկայացվեց․Ն. Զոհրաբյան

    «Հիշո՞ւմ եք, թե նախորդ խորհրդարանում ինչ արմագեդոններով կարողացավ Հանրապետական մեծամասնությունն անցկացնել համայնքների խոշորացման ռեֆորմը։ Եվ համայնքների խոշորացման որևէ հաջողված պատմություն այդպես էլ չներկայացվեց», – Ազգային ժողովում այսօր հայտարարեց ԲՀԿ-ից Նաիրա Զոհրաբյանը։ Նա ասաց, որ հիմա էլ կան դժգոհություններ խոշորացված համայնքներում։ Զոհրաբյանը նկարագրեց դրանցից մի քանիսը՝ ճանապարհների ու ենթակառուցվածքների բացակայությունը, շտապօգնության մեքենաների՝ մեծ տարածություն հաղթահարելու ստիպվածությունը և այլն։ Զոհրաբյանի խոսքով՝ չի կարելի բոլորին մեկ որոշմամբ խոշորացնել, պետք է հաշվի առնել համայնքային տարբեր կապերը, լոգիստիկան, լոգիկան և այլն։ Ինչ վերաբերում է նրան, որ համայնքների խոշորացման ժամանակ բնակավայրերում անցկացվող հանրաքվեներն իրավական արժեք չեն ունենալու, դա, ըստ Զոհրաբյանի, անարգանք է այդ համայնքների բնակիչների հանդեպ։

  • Ես ներում եմ բոլոր նրանց, ում պատճառով խլվեց իմ իրավունքը․ Սեպուհ արքեպիսկոպոս Չուլջյան

    Հայ Առաքելական եկեղեցու Գուգարաց թեմի առաջնորդ Սեպուհ արքեպիսկոպոս Չուլջյանը հայտարարությամբ է հանդես եկել Կ. Պոլսի 85-րդ պատրիարքի ընտրության առնչությամբ: Ermenihaber-ը ներկայացնում է հայտարարության տեքստն ամբողջությամբ․ «Թուրքիո հայ հավատավոր ժողովրդին «Քարերը կտրելու (թափելու) ժամանակը և քարերը հավաքելու ժամանակը» ( Ժող. 3:5) Հոգելույս Մեսրոպ արքեպիսկոպոս Մութաֆյանի հիվանդությամբ սկսված և տարիներ տևած ընտրական գործընթացը, ցավոք, բազմաթիվ խնդիրների, բաժանարար գծերի, նեղ, շահադիտական հավակնությունների գերադասման և համայնքային շահի ոտնահարման դրսևորումների պատճառ դարձավ: Այդ մասին անցնող տարիներին եղել են բազմաթիվ անդրադարձներ: Սակայն տարիներ տևած թնջուկը` պատրիարքի ընտրությունը, ավա՜ղ, չստացավ սպասված հանգուցալուծում և փոփոխված կանոնադրությունը համայնքին բերեց ոչ թե հույս, այլ հասցրեց ևս մի նոր հուսախաբության: Այլևս բացարձակ ճշմարտություն է, որ «կանոնադրական փոփոխության» ծրագրավորված բեմադրության իրական պատճառը հիմնականում իմ անձն էր, քանի որ ընտրություններում Թուրքիայի հավատավոր հայ ժողովրդի մի ստվար հատվածի աջակցությունն ինձ անկասկած որոշիչ կարող էր լինել: Եվ այս բեմականացման հանցավոր հեղինակները բոլորին հայտնի մի քանի գավառամիտ կղերականերն ու մի քանի նեղմիտ աշխարհականներն են, ովքեր փորձեցին ստվեր գցել պոլսահայ պատվարժան ժողովրդի անվանը: Նրանք էին, որ օգտվելով անպատժելիության, անօրինականության և թողտվության մթնոլորտից, գերաշնորհ Գարեգին արք. Բեկչյանին իբրև ընտրյալ տեղապահ Պատրիարքարանից անօրինաբար դուրս թողնելով՝ հող նախապատրաստեցին հիշյալ դավադիր փոփոխությունը կանոնադրության մեջ կատարելու և Պատրիարքարանի դուռն իմ և մյուս եպիսկոպոսների առջև գոցելու համար: Տեղի ունեցածը պատմական աղաղակող անարդարություն էր Պոլսո համայնքի ոչ միայն ներկա այլև գալիք սերունդների նկատմամբ: Ինչպես ասում է Երեմիա մարգարեն. «Հարքն ազոխ կերան եւ որդւոց ատամունք առին» (Երեմ:, ԼԱ, 29): Պատրիարքի թեկնածու իմ սրբազան եղբայրներն ու նախաձեռնարկ մարմինը մեր և համայնքի խնդրանքներին ու հորդորներին չանսացին և չկամեցան Թուրքիո Հայոց պատրիարքության և հավատավոր հայությանը վայել արժանապատիվ և «լայնախարիսխ» ընտրությունների նախապատրաստել: Սակայն, նրանք գերադասեցին նեղ, հիմնականում անձնական, իրավիճակային նկրտումներն ու դրանց բավարարումը, որովհետև նախապատվեցին ստեղծված գաղջ մթնոլորտի շարունակականությունը: Ստեղծվում է այնպիսի տպավորություն, որ, լինելով ներսում, նրանք, ամենայն հավանականությամբ, չեն էլ գիտակցում այդ համայնքի առողջացման դեղատոմսերի, այն է՝ կատարվելիք փոփոխությունների անհրաժեշտությունը: Ինչևէ, այսօր արդեն ունենք այն, ինչ ունենք, և այժմ «քարերը հավաքելու ժամանակն է»: Ժամանակն է համայնքի խնդիրներին նայել ոչ միայն ներսի, այլև դրսի աչքով, քանի որ արդեն երևան են եկել բազմաթիվ խնդիրներ, որոնք ներսի ուժերով միայն հնարավոր չեղավ առայսօր լուծել, և համոզված եմ, որ առաջիկայում ևս չեն լուծվելու, եթե համայնքի հոգևոր և աշխարհիկ առաջնորդները չառերեսվեն անցնող 12 տարիների անօրինականությունների և կոպտագույն սխալների հետ: Պետք է գնահատական տրվի նախորդ տարիների՝ Պատրիարքության անընդունելի ընթացքին, փաստացի թուլացմանն ու պառակտմանը և վարկանիշի կորստյան փաստին ու պատճառներին: Դիմելով Թուրքիայի իմ սիրելի հոգևոր եղբայրներին ու հավատավոր պոլսահայությանը` ուզում եմ անկեղծ խոստովանությամբ հավաստիացնել, որ պատրիարք ընտրվելուս ձգտումը պայմանավորված է եղել ոչ թե պատրիարքական աթոռին կամ առհասարակ իշխանության հասնելուu տենչով (բնավ երբեք), այլ Պոլսի Աթոռի հանդեպ տածած սիրո և ծնունդով մալաթիացուս հոգու պարտքի ու ծառայության գիտակցությամբ: Ուստի փոփոխված կանոնադրությունը չի կարողանա ինձ հեռու պահել պոլսահայության և պատրիարքության նկատմամբ իմ պարտավորություններին հավատարիմ մնալուց: Ավելին՝ հետայսու որևէ հանգամանք չի կարող խոչընդոտել այն բանին, որ ես մնամ Թուրքիայի հայ համայնքի կողքին՝ փորձելով օգնել առկա խնդիրների լուծմանը: – Թուրքիայի հայ համայնքի հավատավոր ժողովուրդ, լինելով հայ եկեղեցու հոգևոր առաջնորդներից մեկը և ելնելով ազգի առջև պատասխանատվության բարձր գիտակցությունից՝ ես, շնորհակալություն հայտնելով իմ կողմնակիցներին և տուրք չտալով գայթակղություններին, կոչ եմ անում հանուն համայնքի խաղաղության և բնականոն մթնոլորտի հաստատման, հանուն Հայոց պատրիարքության բարգավաճման՝ գնալ ընտրությունների և ընտրել 12 եպիսկոպոսներից որևէ մեկին՝ ձեր պատրիարքին: Նախապայման չէ, թե ձեր թեկնածուն Պոլսից է, թե Պոլսից դուրս: Այս կերպ միայն հնարավոր է վերականգնել համայնքի վիրավորված արժանապատվությունն ու իրավունքը: Անշուշտ ամեն մարդ ընտրության մեջ ազատ է: Պատրիարքի թեկնածու իմ Սրբազան եղբայրներին դարձյալ կոչ եմ անում առաջնորդվել միասնականության, քրիստոնեական սիրո և համայնքային շահի կարևորման տրամաբանությամբ և գիտակցել, որ անձնական շահերին գերակայություն տալու, համայնքի ցանկությանը հակառակ արված քայլերի հավաքական պատասխանը այն անառողջ, պառակտված վիճակն է, որ ներկայումս կա համայնքում: Նա, ով կընտրվի պատրիարք, պետք է անդուլ ջանք թափի՝ վայելելու աշխարհով մեկ սփռված թուրքահայության սերն ու ակնածանքը, դառնալու նրանց բոլորի ազգընտիր առաջնորդը, հուսալի պատրիարքը և խնամարկու հայրը: Հույս ունեմ, որ ընտրյալ պատրիարքը ականջալուր կլինի իմ և ինձ նմանների անհանգստությունից, մտահոգությունից և ավելի լավը տեսնելու ցանկությունից բխող խորհուրդներին, հորդորներին ու նկատառումներին: Առաջնորդվելով քրիստոնեական ներողամտությամբ` ես ներում եմ բոլոր նրանց, ում պատճառով խլվեց իմ իրավունքը: Թող Աստված լինի բոլորիս դատավորը: Մնացեք խաղաղությամբ: Օրհնությամբ՝ Սեպուհ արքեպիսկոպոս Չուլջյան Առաջնորդ Գուգարաց թեմի»

  • Գևորգ Կոստանյանը Մարտի 1-ի գործով մեղադրյալ է ներգրավվել 5 հոդվածներով. ՀՔԾ պարզաբանումը

    Նախկին գլխավոր դատախազ Գևորգ Կոստանյանը Մարտի 1-ի գործով մեղադրյալ է ներգրավվել միանգամից 5 հոդվածով։ Այս մասին «Ազատության» հարցմանն ի պատասխան տեղեկացրել են Հատուկ քննչական ծառայությունից (ՀՔԾ)։ Մասնավորապես, նախկին պաշտոնյան մեղադրյալ է ներգրավվել պաշտոնեական կեղծիք կատարելու (Քրեական օրենսգրքի 314-րդ հոդվածի 1-ին մասով), պաշտոնեական լիազորությունները չարաշահելուն դրդելու ( 38-308-րդ հոդվածի 2-րդ մասով), պաշտոնեական կեղծիք կատարելուն դրդելու (38-314-րդ հոդվածի 1-ին մասով), ծանր կամ առանձնապես ծանր հանցագործությունը պարտակելուն դրդելու (38-334-րդ հոդվածի 1-ին մասով), ծանր կամ առանձնապես ծանր հանցագործությունների վերաբերյալ գործերով ապացույցների կեղծմանը դրդելու (38-349-րդ հոդվածի 3-րդ մասի 1-ին կետով) հոդվածներով։

Լրահոս
Ստանիսլավ Զասն այս ամիս կայցելի Հայաստան
Էդմոն Մարուքյանին սպառնալու փաստով հարուցվել է քրեական գործ
Վաղը ամբողջ օրը սպասվում է բուք, ձյուն և ձնախառն անձրև
Հանձնաժողովը քննարկել է ՀԸԳՀ ճանապարհային քարտեզի 2020թ. միջոցառումների իրականացման ընթացքը
Հայաստանում միակ կենտրոնը՝ որտեղ առաջարկում ենք 3 տեսակի արևայրուք
Հայաստանում բացվեց առաջին անգլալեզու մանկական զարգացման կենտրոնը
Հարավային Կորեայում կորոնավիրուսի բռնկման պատճառով մեկուսացվել է 7,9 հազար զինծառայող
Որո՞նք են «Մյունխենյան սկզբունքները». հարց ԱԳ նախարարին
«Հրազդան» ԲԿ տնօրենի ազատումը պայմանավորված է առանձնապես խոշոր չափի ֆինանսական չարաշահումներով. Կոտայքի մարզպետ
Արցախում կդադարեցվեն հանրակրթական և նախադպրոցական ուսումնական հաստատությունների պարապմունքները
Արարատ Միրզոյանի գլխավորած պատվիրակությունն այցելել է Դանիայի Արդյունաբերական կոնֆեդերացիա
Հայամետ թուրք գործիչը 840-օրյա կալանքից հետո ազատ է արձակվել
Վարչապետն ընդունել է Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցչին
Պեկինում 6 օրում շնչադիմակների գործարան կկառուցվի
Կադրային փոփոխություններ գլխավոր դատախազությունում
Խմբագրի ընտրանի

Ստանիսլավ Զասն այս ամիս կայցելի Հայաստան

Փետրվարի 26-28-ը Հավաքական անվտանգության համաձայնագրի կազմակերպության գլխավոր քարտուղար Ստանիսլավ Զասը կայցելի Հայաստանի Հանրապետո... Դիտել ավելին

Տեսանյութ

Մեծ Բրիտանիան հայտնվել է հզոր փոթորկի հարվածի տակ

«Կիարա» հզոր փոթորիկը պատուհասել է Մեծ Բրիտանիային։ Քամու արագությունը գերազանցում է 144 կմ/ժամը։ Երկրի շատ շրջաններում առկա է հեղեղումների լուրջ վտանգ։ ВВС-ի փոխանցմամբ՝ Մեծ Բրիտանիայում վտանգավորության դեղին մակարդակ է հայտարարվել։ Առանց էլեկտրականության է մնացել մոտ 138 հազար տուն։ Հաղորդվում է 3.... Դիտել ավելին

Մամուլի բաժին
Ուղիղ   խոսք