• հուլիսի 1-ից Վրաստանը կսկսի զբոսաշրջիկներ ընդունել հիմնականում այն երկրներից, որտեղ կորոնավիրուսի տարածվածության մակարդակը ցածր է

    Վրաստանը հուլիսի 1-ից կսկսի զբոսաշրջիկներ ընդունել հիմնականում այն երկրներից, որտեղ կորոնավիրուսի տարածվածության մակարդակը ցածր է` համաձայն Վրաստանի առողջապահության նախարարության կարգադրությունների: Այս մասին տեղեկացնում է kvira.ge կայքը` հղում տալով Վրաստանի հիվանդությունների վերահսկողության ազգային կենտրոնի ղեկավար Ամիրան Գամկրելիձեին: «Առաջին հերթին մենք զբոսաշրջիկներ կընդունենք, այսպես կոչված, կանաչ երկրներից և կանաչ տրանսպորտային միջանցքներից, որտեղ բնակչության՝ կորոնավիրուսով վարակման ցուցանիշը համեմատաբար ցածր է: Արտասահմանցի զբոսաշրջիկներին որոշակի պահանջներ կներկայացվեն երկիր մտնելու և երկրում շրջելու համար»,-ասել է Գամկրելիձեն: Նա հայտարարել է, որ Վրաստանում անհանգստությամբ են հետևում հարևան երկրներում`Հայաստանում, Ռուսաստանում, Թուրքիայում և Ադրբեջանում կորոնավիրուսային իրավիճակին: Գամկրելիձեն նշել է, որ զբոսաշրջիկներին ներկայացվող պահանջները դժվարկատարելի չեն, առաջին հերթին դա վերաբերում է կորոնավիրուսի առկայությունը ժխտող փաստաթղթերին: «Ամենայն հավանականությամբ զբոսաշրջիկների համար կստեղծվի, այսպես կոչված, COVID-19 անձնագիր, որը կհաստատի, որ զբոսաշրջիկը վերջին 72 ժամվա ընթացքում լաբորատոր թեստավորում է անցել, որի պատասխանը բացասական է»,-նշել է Գամկրելիձեն: Վրաստանում, վերջին տվյալներով, գրանցվել է կորոնավիրուսով վարակման 723 դեպք, վարակման հետևանքով մահացել է 12 մարդ:

  • Աննա Հակոբյանը՝ Արցախում. Ես եւ բազմաթիվ կանայք, պատրաստ են զենք վերցնել իրենց հայրենիքը եւ երեխաներին պաշտպանելու.

    ՀՀ վարչապետի տիկին, «Իմ քայլը» եւ «City of smile/Ժպիտների քաղաք» բարեգործական հիմնադրամների հոգաբարձուների խորհրդի նախագահ Աննա Հակոբյանը Արցախի հանրապետության նախագահի տիկին Կրիստինե Հարությունյանի ուղեկցությամբ մայիսի 22-ին Ստեփանակերտում հանդիպել է Արցախում ակտիվ հասարակական, քաղաքական եւ մշակութային գործունեություն իրականացնող կանանց հետ։ Հանդիպմանը Աննա Հակոբյանը ներկայացրել է «Կանայք հանուն խաղաղության» արշավի զարգացումներն ու ապագա ծրագրերը։ Իր խոսքում վարչապետի տիկինը նշել է, որ «Կանայք հանուն խաղաղության» արշավի նպատակն է միավորել բոլոր կանանց, որպեսզի նրանք պահանջեն քաղաքական որոշում կայնողներից, որոնք հիմնականում տղամարդիկ են, տարբեր երկրների միջեւ գոյություն ունեցող հակամարտությունները լուծել խաղաղ ճանապարհով: «Մենք որպես կին, մայր, քույր բոլոր իրավունքներն ունենք մեր ամուսիններից պահանջելու խնայել մեր որդիների, եղբայրների, ամուսինների կյանքերը եւ ուժի մրցավազքը մարտի դաշտից տեղափոխել մտքի, ուղեղի դաշտ: Անհնարին ոչինչ չկա, եւ ընդամենը քաղաքական կամք է հարկավոր պատերազմներից հրաժարվելու եւ բոլոր հակամարտությունները բանակցությունների ճանապարհով լուծելու համար: Բանակցությունների սեղանն ավելի պակաս պայքարի դաշտ չէ, ընդ որում այնտեղ բոլորը կարող են լինել հաղթող, ուղղակի ի տարբերություն պատերազմի, այդ ընթացքում կօգտագործվի մարդկային միտքը եւ ոչ թե տարբեր մարդկանց, հազարավոր մարդկանց կյանքերը: Բանակցություններում յուրաքանչյուրը կարող է տանել իր հաղթանակը»,- ասել է Աննա Հակոբյանը՝ նշելով, որ շատերը փորձում են արշավը մեկնաբանել որպես թուլության դրսեւորում, որը թյուր տեսակետ է։ «Համոզված եմ եւ վստահ, որ Արցախի նկատմամբ ռազմական ոտնձգության պարագայում ոչ միայն մեր բանակը այլեւ մեր ողջ հանրությունն է կանգնելու նրա պաշտպանության դիրքերում` զինվորական թե քաղաքացիական, տղամարդ թե կին: Ինչպես ես, այնպես էլ բազմաթիվ կանայք, համոզված եմ, պատրաստ են զենք վերցնել իրենց հայրենիքը եւ երեխաներին պաշտպանելու: Բայց դա ոչ թե հանուն պատերազմի, այլ ապացուցելու համար, որ խաղաղությունն այլընտրանք չունի: Այս համատեքստում կարծում եմ, որ մենք մեր ժամանակի մի շատ կարեւոր մասը կծախսենք «Կանայք հանուն խաղաղության» արշավի վրա, եւ որպես վերը նշված խոսքերի ապացույց պատրաստվում ենք նաեւ մարտական պատրաստության դասընթացներ անցնել: Մենք որպես կին եւ մայր պետք է ջանք չխնայենք մեր երկրներին եւ տարածաշրջանին տեւական խաղաղություն բերելու համար: Հենց դրան է նվիրված «Կանայք հանուն խաղաղության›› արշավը»,- ասել է Աննա Հակոբյանը՝ հավելելով, որ որքան շատ կին միանա խաղաղության այս արշավին այնքան այն ավելի զորեղ կդառնա: «Այս արշավը չի ճանաչում ազգություն, կրոն, մաշկի գույն, բոլորը կարող ենք միանալ խաղաղության այս կոչին: Մենք հավատում ենք, որ Մայրական տիեզերական սիրո առաջ անզոր են աշխարհի բոլոր զենքերը»,- եզրափակել է Աննա Հակոբյանը։ Հանդիպմանը Արցախում ակտիվ գործունեություն ծավալող կանայք շեշտել են, որ նախաձեռնությունը ողջունում են եւ պատրաստ են աջակցել։ Հայ օգնության միության ներկայացուցիչ Արմինե Հարությունյանը բարձր գնահատելով նախաձեռնությունը շեշտել է, որ հատկապես Արցախում բնակվող կանայք շատ լավ գիտեն խաղաղության գինը։ «Բոլորս էլ ունեցել ենք թանկ կորուստներ։ Մենք մեզ վրա զգում ենք այդ ցավը եւ շատ լավ գիտենք՝ ինչ է նշանակում խաղաղություն»։ Սուսաննա Հայրապետյանն էլ հավելել է, որ վարչապետի տիկնոջ նախաձեռնությունը Արցախում ողջունելի է եւ արցախցի կանայք պատրաստակամ են օգտակար լինել։ Հանդիպմանը տեղի է ունեցել ‹‹Կանայք հանուն խաղաղության›› կայքի շնորհանդեսը։

  • Ե՞րբ կմեկնարկի Տոկիոյի Օլիմպիական Խաղերը.

    Միջազգային օլիմպիական կոմիտեի (ՄՕԿ) նախագահ Թոմաս Բախը հայտարարել է Տոկիոյի Օլիմպիական խաղերի լիակատար չեղյալ հայտարարելու հավանականության մասին, եթե դրանք չկայանան 2021 թվականի ամռանը: Տոկիոյում խաղերը պետք է կայանային 2020-ի ամռանը, բայց կորոնավիրուսի համաճարակի պատճառով մրցաշարը հետաձգվեց մեկ տարով: Ըստ Բախի, Ճապոնիայի վարչապետ Սինձո Աբեն հասկացրել է, որ հաջորդ ամառ մրցաշարը անցկացնելու վերջին տարբերակն է: «Մենք որդեգրել ենք մեկ սկզբունք՝ կազմակերպել այս խաղերը անվտանգ միջավայրում բոլոր մասնակիցների համար: Ոչ ոք չգիտի, թե ինչ տեսք կունենա աշխարհում մեկ կամ երկու ամիս հետո: Հետևաբար, մենք պետք է ապավինենք մասնագետներին, այնուհետև համապատասխան որոշում կայացնենք՝ հիմնվելով նրանց խորհուրդների վրա: Ես հասկանում եմ, որ անհնար է անընդհատ հետաձգել մրցաշարը և կազմկոմիտեում 3000-ից 5000 մարդ վարձել: Հնարավոր չէ նաև ամեն տարի փոխել միջազգային ֆեդերացիաների ժամանակացույցը, քանի որ մարզիկները պետք է ունենան որոշակիություն: Մենք պետք է պատրաստ լինենք տարբեր սցենարների, հուսով ենք, որ այս խաղերն անցկացվելու են հաջորդ տարվա հուլիսին: Այնուամենայնիվ, անվտանգ միջավայրի կազմակերպման համար կարող են պահանջվել լրացուցիչ միջոցներ, և կարող են կարանտինային պահանջներ լինել Օլիմպիական խաղերի մարզիկների և մյուս մասնակիցների համար », – Բախի խոսքերն է մեջբերում BBC-ին: Բախը պատասխանեց նաև Ճապոնիայում սոցիալական հեռավորության ներկայիս սահմանափակումների վերաբերյալ: Ոմանք կարծում են, որ դրա պատճառով Խաղերը գուցե հարկ լինի անցկացնել փակ դռների հետևում: ՄՕԿ-ի ղեկավարն այս սցենարը անվանել է «շահարկում»: Բացի այդ, հարցազրույցում Բախը աշխարհի բոլոր երկրների կառավարություններին կոչ է արել անել հնարավոր ամեն ինչ՝ սպորտին օգնելու համար համաճարակի պատճառով առաջացած ֆինանսական ճգնաժամի պայմաններում:

  • Victoria’s Secret-ը կփակի շուրջ 250 խանութ ԱՄՆ-ում և Կանադայում կորոնավիրուսի հետևանքով վաճառքների կտրուկ անկման պատճառով.

    L Brands մայր ընկերությունը չորեքշաբթի հայտարարել է, որ ԱՄՆ-ի և Կանադայի ամբողջ տարաքում կորոնավիրուսի հետևանքով վաճառքների կտրուկ անկման պատճառով ընդմիշտ կփակեն Victoria’s Secret-ի և PINK-ի 250 խանութ, գրում է Forbes-ը։ Victoria’s Secret-ը ԱՄՆ-ում և Կանադայում ունի 1091 խանութ, որոնցից 235-ը կփակվեն ԱՄՆ-ում, իսկ մնացածը՝ Կանադայում։ L Brands-ը, որին է պատկանում նաև օծանելիքների, նվերների, մարմնի և լոգանքի պարագաների Bath & Body Works խանութների ցանցը, հայտնել է, որ անցյալ տարվա նույն ժամանակահատվածի համեմատությամբ 2020 թվականի առաջին եռամսյակում զուտ վաճառքը 37 տոկոսով նվազել է։ Victoria’s Secret-ի վաճառքների անկումն ավելին է՝ շուրջ 46 տոկոս՝ հասնելով 821,5 մլն դոլարի։ Ընդ որում` ընկերության գրեթե բոլոր խանութները կորոնավիրուսի պատճառով հարկադրված են եղել փակվել եռամսյակի վերջին շաբաթներին: Բացի Victoria’s Secret -ի 250 խանութներից, L Brands-ը կփակի նաև Bath & Body Works-ի 50 խանութ։

  • Փաշինյանը՝ Հարությունյանին Հայաստան-Արցախ հետագա համագործակցության մասին.

    Ստեփանակերտում տեղի է ունեցել Հայաստանի Հանրապետության վարչապետ Նիկոլ Փաշինյանի և Արցախի Հանրապետության նորընտիր նախագահ Արայիկ Հարությունյանի առանձնազրույցը: «Պարոն Վարչապետ, նախ ուզում եմ շնորհակալություն հայտնել երդմնակալության արարողությանը Ձեր մասնակցության և այն խոսքերի, մտքերի համար, ոոոնք Դուք արտահայտեցիք: Դրանք երկրի առաջնորդի անկեղծ խոսքեր էին, այդ ամենը ես մտահոգության և խորհուրդների տիրույթում եմ դիտարկում և ուզում եմ այսօր ևս հայտարարել, որ պատրաստակամ եմ կիսելու այն բեռը, խնդիրները, որոնք այսօր ծառացած են հայ ժողովրդի, Հայաստան աշխարհի վրա: Շնորհակալություն եմ հայտնում մասնակցության համար»,- նշել է Արայիկ Հարությունյանը: «Շնորհակալ եմ մեծարգո պարոն նախագահ: Նախ թույլ տվեք ևս մեկ անգամ շնորհավորել Ձեզ Արցախի Հանրապետության նախագահ ընտրվելու և պաշտոնամուտի առիթով: Երեկ իսկապես պաշտոնամուտի տպավորիչ միջոցառումներ տեղի ունեցան և տպավորիչ առաջին հերթին բովանդակության առումով: Մինչ քայլում էինք այստեղ, ես ասացի, որ Արցախում հաստատված է շատ լավ մթնոլորտ և կարծում եմ, որ մեր խնդիրն այս մթնոլորտն այս մակարդակի վրա պահելն է և ավելի զարգացնելը: Եվ իհարկե շատ կարևոր եմ համարում, որ Հայաստանի և Արցախի իշխանությունների միջև արդյունավետ համագործակցություն տեղի ունենա, դրա համար կան անհրաժեշտ բոլոր նախադրյալները: Համոզված եմ` այդպես էլ կլինի»,– իր հերթին նշել է վարչապետ Փաշինյանը: «Միանշանակ համակարծիք եմ պարոն վարչապետ: Մեր հասարակությանը ես դիտարկում եմ որպես մեկ ամբողջություն, չկա Հայաստանի ժողովուրդ, Արցախի ժողովուրդ, կա հայ ժողովուրդ և մենք այդ սկզբունքից ելնելով պետք է պահենք մթնոլորտը, զարգացնենք: Այն նախադրյալները, որոնք այսօր ստեղծված են Արցախում ոչ միայն բարոյահոգեբանական, այլև տնտեսության զարգացման, սոցիալական ծրագրերի, հայրենադարձության առումով, ամեն ինչ հնարավոր է իրականացնել համատեղ աշխատանքի շնորհիվ: Նորից շնորհակալություն եմ հայտնում պարոն վարչապետ»,– եզրափակել է Արցախի նորընտիր նախագահը: Այնուհետև Նիկոլ Փաշինյանը և Արայիկ Հարությունյանը հանդիպումը շարունակել են Հայաստանի և Արցախի արտաքին գործերի նախարարներ` Զոհրաբ Մնացականյանի և Մասիս Մայիլյանի մասնակցությամբ:

  • Կորոնավիրուսի կանխարգելման և բուժման խնդիրների վերաբերյալ միջազգային գործընկերների հետ քննարկումները

    Հանրապետության նախագահ Արմեն Սարգսյանը շարունակում է նոր կորոնավիրուսի համաճարակի կանխարգելման և բուժման խնդիրների վերաբերյալ միջազգային գործընկերների հետ քննարկումները և այդ շարքում մարտի 27-ին հեռախոսազրույց է ունեցել Մեծ Բրիտանիայի լորդերի պալատի անդամ, Լոնդոնի կայսերական քոլեջի Գլոբալ առողջապահական նորարարությունների ինստիտուտի տնօրեն Մեծ Բրիտանիայի առողջապահության նախկին նախարար հայազգի պրոֆեսոր Արա Դարզիի և Մոսկվայի պետական համալսարանին կից բժշկական կենտրոնի ղեկավար, ակադեմիկոս Արամայիս Կամալովի հետ։ Հեռախոսազրույցի ընթացքում ակադեմիկոս Կամալովի հետ քննարկվել են բժշկական ինժեներիայի ոլորտում հնարավոր համագործակցության հարցերը։ Անդրադառնալով նոր կորոնավիրուսի վերաբերյալ Լորդ Դարզիի հետ իրենց նախորդ քննարկմանը՝ հեռախոսազրույցի ընթացքում նախագահը կարևորել է նոր կորոնավիրուսի համաճարակը հաղթահարելու գործում ջանքերի համատեղումը և համագործակցությունը, փորձի փոխանակման և փոխօգնության անհրաժեշտությունը։ Նախագահը նշել է, որ Երևանի Մխիթար Հերացու անվան պետական բժշկական համալսարանի և Հայաստանի ազգային պոլիտեխնիկական համալսարանի ուսանողների հետ հեռավար ուսուցման դասախոսության ընթացքում առաջարկել է ապագա բժիշկներին և ինժեներներին աշխատել նոր կորոնավիրուսի բուժման համար կիրառվող թոքերի պարզագույն օդափոխիչներ ստեղծելու և Հայաստանում արտադրելու ուղղությամբ: Նախագահն առաջարկել է Լորդ Դարզիին դիտարկել Լոնդոնի կայսերեկան քոլեջի բժշկական ինժեներիայի ոլորտի մասնագետների կողմից իր այս նախաձեռնությանն աջակցություն ցուցաբերելու և հայկական երկու բուհերի հետ համագործակցության հնարավորությունը։ Նշենք, որ նախագահ Սարգսյանը մարտի 21-ին հեռախոսազրույց էր ունեցել նաև ամերիկահայ հայտնի գործարար և բարերար, Ամերիկյան Moderna Therapeutics կենսատեխնոլոգիական ընկերության համահիմնադիր և նախագահ Նուբար Աֆեյանի հետ, որի ընթացքում վերջինս անդրադարձել էր ընկերության կողմից կորոնավիրուսի դեմ պատվաստանյութի ստեղծման և փորձարկման աշխատանքներին: Այս համատեքստում նախագահը ողջունում է Լորդ Դարզիի, Նուբար Աֆեյանի, McKinsey&Company ընկերության Ճապոնիայի մասնաճյուղի կառավարիչ գործընկեր, ընկերության խորհրդի անդամ Անդրե Անդոնյանի, IDeA հիմնադրամի համահիմնադիր, UWC Դիլիջան դպրոցի համահիմնադիր, Ավրորա մարդասիրական նախաձեռնության համահիմնադիր, Հայաստանի գիտւթյան և տեխնոլոգիաների հիմնադրամի (FAST) համահիմնադիր և խորհրդի անդամ, գործարար, ներդրող, բարերար Ռուբեն Վարդանյանի և ՀՀ առողջապահության նախարար Արսեն Թորոսյանի մասնակցությամբ FAST հիմնադրամի կողմից կազմակերպվող և այսօր կայանալիք տեսակոնֆերանսը՝ համագործակցության ընդլայնման հնարավորությունները և գործնական աջակցության քայլերը քննարկելու նպատակով։

  • Հակառակորդը խախտել է հրադադարի պահպանման ռեժիմը ավելի քան 150 անգամ

    Մարտի 22-ից 28-ն ընկած ժամանակահատվածում արցախա-ադրբեջանական հակամարտ զորքերի շփման գոտում հակառակորդը խախտել է հրադադարի պահպանման ռեժիմը ավելի քան 150 անգամ` տարբեր տրամաչափի հրաձգային զինատեսակներից հայ դիրքապահների ուղղությամբ արձակելով շուրջ 1200 կրակոց: ՊԲ առաջապահ զորամասերը հետևում են հրադադարի պահպանման ռեժիմին և շարունակում վստահորեն իրականացնել մարտական հերթապահություն:

  • Ֆրանսիայի շնորհակալությունը բժիշկներին

    Փարիզում բժիշկներին երախտագիտություն հայտնելու յուրահատուկ ձև են գտել: Երեկոյան 10 րեպեով վառվել են էյֆելյան աշտարակի լույսերը: Աշտարակի վրա լուսային էֆեկտներով գրված է եղել «շնորհակալություն»:

  • Պետք Է Սառեցվեն Բիզնես Կենտրոնների Վարձավճարները. Սամվել Չիբուխչյան

    Ֆեյսբուքյան օգտատեր Սամվել Չիբուխչյանն իր էջում գրել է․ Պետք է սառեցվեն Բիզնես կենտրոններում և հյուրանոցներում վարձով տրված տարածքների մարտ-ապրիլ ամիսների վարձավճարները։ Ստեղծված իրավիճակում, երբ վարձակալված տարածքներում գործունեություն իրականացնելը գրեթե անհնարին է, անընդունելի է վարձավճարներ ներկայացնել վարձակալներին և ռիսկի տակ դնել նրանց հետագա գործունեությունը, ուստի կոչ պետք է արվի տարածքների սեփականատերերին ստեղծված դրության մեջ մտնել և սառեցնել վարձավճարները մի որոշ ժամանակով, ինչպես անում են համարյա բոլոր անհատ տարածքների սեփականատերերը։

  • Ունենք կորոնավիրուսով վարակված բուժքույր, մեկ բժիշկ և շտապօգնության մեկ վարորդ. Արսեն Թորոսյան

    Արսեն Թորոսյանն այսօր հրավիրված ասուլիսի ժամանակ հաստատել է, որ բուժաշխատողների շրջանում, բացի բուժքրոջից, կան վարակվածության այլ դեպքեր: «Դժբախտաբար կան, բուժքրոջ վիճակը վստահ եմ, լավ է, իսկ եթե լիներ վատ, հաստատ կիմանայի, ունենք ևս մեկ բժիշկ, ունենք շտապօգնության վարորդ վարակված, ինչքան էլ փորձում ենք պաշտպանել, միևնույն է, շատ են շփվում վարակված անձանց հետ»,- ասել է նախարարը: Թորոսյանը նշել է, որ նրանց կյանքին վտանգ չի սպառնում: Լրևգրողները հարցրել են նաև, թե Էրեբունու և Չարենցավանի արտադրամասերի օջախների բոլոր անձինք բացահայտվա՞ծ են. «Չեմ կարող պնդել, բայց կարող եմ ասել, որ մի քանի հարյուր անձ է մեկուսացել այդ երկու արտադրամասերի շփումներից, ինֆորմացիան անընդհատ փոխվում է, երեկ 140 հոգի մեկուսացվել է Էրեբունու արտադրամասից, ևս մի 100 հոգի ուրիշ արտադրամասից, մենք շարունակում ենք, քանի դեռ ունենք կասկած, ու ռեսուրս նրանց պահելու»:

  • Մինչև 1 մլն դրամի չափ գյուղատնտեսական բոլոր վարկերը կազատվեն տոկոսներից

    Կորոնավիրուսից տնտեսությունը պաշտպանելու համար կառավարությունն այսօր ներկայացրեց նոր ծրագրեր, որոնցից մեկը վերաբերում է կոնկրետ գյուղատնտեսությանը։ Առաջարկվում է մինչև 1 մլն դրամի չափ գյուղատնտեսական բոլոր վարկերն ազատել տոկոսներից։ Այդ տոկոսները կվճարվեն պետբյուջեից։ Կառավարության նիստի ժամանակ էկոնոմիկայի նախարարը բացատրեց, որ աջակցության այս տարբերակի դեպքում որևէ գյուղատնտեսական ոլորտ դուրս չի մնա ծրագրից։ Սակայն վարկերը պետք է լինեն հենց այդ չափով, ոչ ավելի։ Նախարարը նաև տեղեկացրեց, որ մինչ այս ընդունված գյուղատնտեսական ծրագրերի դեպքում իրենք նույնպես զրոյացնելու են վարկերի տոկոսները․ դրանք վճարվելու են բյուջեից։ Խոսքը վերաբերում է լիզինգով տեխնիկա ձեռք բերելու, հակակարկտային ցանցեր գնելու և այլ ծրագրերին։

  • 897 տրանսպորտային միջոցների մեջ եղել են 2-ից ավելի անձինք, որոշումը խախտած բոլոր անձինք իջեցվել են մեքենաներից

    Ոստիկանությունը շարունակում է ապահովել նոր կորոնավիրուսի հնարավոր տարածումը կանխելու նպատակով անձանց ազատ տեղաշարժի սահմանափակումների վերաբերյալ Պարետի որոշման կատարումը։ Որոշումը ուժի մեջ մտնելուց հետո մինչև մարտի 26-ի ժամը 12-ը, ճանապարհային ոստիկանության ծառայողները հանրապետությունում հայտնաբերել են 897 տրանսպորտային միջոցներ, որոնց մեջ եղել են 2-ից ավելի անձինք։ Որոշումը խախտած բոլոր անձինք իջեցվել են մեքենաներից։ Վարչական իրավախախտման վերաբերյալ արձանագրություններ են կազմվել հասարակական տրանսպորտի 25 վարորդների նկատմամբ, որոնք տեղափոխել են սահմանված քանակից ավելի ուղևորներ։ Բնակչությանը ևս մեկ անգամ հորդորում ենք` խստագույնս սահմանափակել բնակարաններից դուրս գալը և բնակարաններից դուրս գալ բացառապես ծայրահեղ անհրաժեշտության դեպքում։ Վարորդներին հորդորում ենք տեղափոխել միայն մեկ ուղևորի՝ պահպանելով Պարետի որոշմամբ սահմանված պահանջները։

  • Երեք զինծառայողներ վարակվել են կորոնավիրուսով. Դավիթ Տոնոյան

    ՀՀ պաշտպանության նախարար ԴԱՎԻԹ ՏՈՆՈՅԱՆԻ պարզաբանումը ի պատասխան լրատվամիջոցների հարցերի. «Կորոնավիրուսային վարակի տարածումը զինված ուժերում կանխելու նպատակով ծավալուն բուժկանխարգելիչ աշխատանքներ ենք իրականացրել՝ ստեղծելով անհրաժեշտ պայմաններ, որպեսզի զինծառայողները զերծ մնան վարակից: Այնուամենայնիվ, հնարավոր չէ կանխել վարակի ներթափանցումը բանակ, քանի որ զինծառայողների մի մեծ զանգված ամենօրյա շփման մեջ է քաղաքացիական բնակչության հետ: Մարտի 25-ին մարտական խնդիրներում չներգրավված զորամասի երեք զինծառայողներից կատարվել էր նմուշառում։ COVID-19 հետազոտման թեստի արդյունքում երեք զինծառայողների մոտ ախտորոշվել է կորոնավիրուս։ Զինծառայողներից մեկի ընտանիքի անդամի մոտ ավելի վաղ էր հաստատվել կորոնավիրուսի առկայություն: Երեք զինծառայողի հաստատված դեպքերը փոխկապակցված են և առնչվում են երկրում գրանցված առաջնակի դեպքերի օջախներից մեկի հետ: Ելնելով համաճարակաբանական հետազոտությունների տվյալներից, նշված զինծառայողները նախապես եղել են մեկուսացված, ինչը զգալիորեն նվազեցրել է վարակի հետագա տարածման ռիսկերը։ Զինծառայողներն այժմ հոսպիտալացված են, նրանց առողջական վիճակը բավարար է, որևէ մեկի մոտ թոքաբորբ չի արձանագրվել։ Զինծառայողներից մեկի մոտ առկա է ջերմության թույլ բարձրացում, իսկ երկուսը չունեն ջերմություն և հիվանդությանը բնորոշ այլ ախտանիշներ: Հավաստիացնում եմ, որ կորոնավիրուսային հիվանդության ախտանիշով զինծառայողներին բարձրորակ և արդյունավետ բուժօգնություն է ցուցաբերվում, նրանց կյանքին վտանգ չի սպառնում: Միաժամանակ պարզված է զինծառայողների շփումների ամբողջ շրջանակը։ Սերտ շփում ունեցածներն ու հավանական կոնտակտավորները մեկուսացված են նախապես նախորոշված առանձնացված տարածքներում։ Նրանց նկատմամբ նույնպես սահմանված է ամենօրյա խիստ հսկողություն և ապահովված են անհրաժեշտ պայմանները։ Վիրուսի առկայության թեստավորման նպատակով ևս 32 զինծառայողից կատարվել է նմուշառում: Տվյալ զորամասում, որը տեղակայված է առաջնագծից զգալի հեռավորության վրա, հայտարարված է զորանոցային դրություն, ձեռնարկված են ամենախիստ հակահամաճարակային միջոցառումները, իրականացվում է բժշկական մշտադիտարկում։ Միաժամանակ հարկ եմ համարում ևս մեկ անգամ ընդգծել, որ Պաշտպանության բանակում առայսօր կորոնավիրուսային հիվանդության ախտանիշով որևէ դեպք չի արձանագրվել: ՀՀ զինված ուժերում շարունակվում են ձեռնարկված լայնածավալ կանխարգելիչ միջոցառումները: Բոլոր զորամասերում կիրառվում են խիստ սահմանափակումներ վարակի ներթափանցումը կանխելու ուղղությամբ, սահմանված է ամենօրյա վերահսկողություն զինծառայողների առողջական վիճակի նկատմամբ: Վերջին մեկ ամսվա ընթացքում զինված ուժերում իրականացվող համալիր հակահամաճարակային միջոցառումների և կիրառվող խիստ սահմանափակուների արդյունքում շեշտակի նվազել է ոչ պակաս վտանգավոր այլ վարակիչ հիվանդությունների քանակը, ինչը միանշանակ վկայում է իրականացվող միջոցառումների արդյունավետության մասին: Մասնավորապես, նախորդ տարիների նույն ժամանակահատվածի համեմատությամբ, «սուր շնչառական հիվանդություններով», «ջրծաղիկով», «անգինայով» հիվանդացությունները նվազել են 4 անգամ, իսկ աղիքային վարակով հիվանդներ ներկայումս ԶՈՒ անձնակազմի շրջանում ընդհանրապես չկան: Հատկանշական է, որ վերջին տարիներին 5 անգամ նվազել է «թոքաբորբով» հիվանդացությունը, իսկ ծանր ընթացքով «թոքաբորբերի» քանակը՝ 10 անգամ, ատիպիկ ընթացքով և մահվան ելքով «թոքաբորբեր» զինված ուժերում չեն արձանագրվել: Վստահ եմ, որ այս ճակատում ևս կհաջողենք»։ Երեկ տեղեկացրել էինք, որ COVID-19 թեստավորման համար նմուշառում է իրականացվել երեք զինծառայողներից:

  • Սկսվում է քաղաքական պայքարի նոր փուլ. Ռոբերտ Քոչարյան

    Այսօր կայացել է նախագահ Ռոբերտ Քոչարյանի աջակիցների հավաքը, որի ընթացքում նրա որդին՝ Լևոն Քոչարյանը, ընթերցել է նախագահի ուղերձը՝ ուղղված իր աջակիցներին: Այս մասին տեղեկացնում է երկրորդ նախագահի կայքը: Ուղերձում, մասնավորապես, ասված է. «Հարգելի՛ բարեկամներ Ողջունում եմ ձեզ և այսօրվա միջոցառումը: Ուզում եմ նախ և առաջ իմ երախտագիտությունը հայտնել ձեզ՝ ձեր հստակ դիրքորոշման, քաղաքացիական քաջության ու պարզ բառով ասած՝ տղամարդկության համար։ Շնորհակալ եմ ձեզ։ Դուք և ձեր նման մարդիկ են, որ կերտել են Հայաստանի ու Արցախի նորագույն ու հերոսական պատմությունը, իրենց քաջության ու սկզբունքայնության շնորհիվ։ Ընդամենը մեկ տարի առաջ հնարավոր չէր նույնիսկ ենթադրել, որ մեր երկրում նորից քաղաքական իմաստ ու արդիականություն կստանա «Միացիր» կոչը։ Եթե 3 տասնամյակ առաջ այն կոչ էր հայ ժողովրդի երկու բաժանված հատվածների միացման, ապա այսօր այդ կոչը միավորում է ապազգայնության, իրավական բեսպրեդելի, պատմության նենգափոխման ու անձնիշխանության դեմ պայքարողներին։ Ցավում եմ, որ այսպիսի զուգահեռ կա, սակայն դա է ճշմարտությունը։ Ուզում եմ այսօր, օգտվելով առիթից, իմ երախտագիտությունը հայտնել նաև բոլոր նրանց, ովքեր ստորագրել են հայտնի «հարյուրի հայտարարությունը»։ Տասնյակ հազարավոր մարդկանց մասնակցությունը պարտավորեցնող է և ստիպում է ինձ պայքարել կրկնակի եռանդով և չընկրկել որևէ դժվարության առաջ։ Ուզում եմ իմանաք. բանտախուցը ընկալում եմ որպես աշխատասենյակ, որտեղ աշխատում եմ՝ հանուն Հայաստանի լավ ապագայի։ Այն ապագայի, որտեղ կհարգվեն մեր ազգային արժեքները, մեր ինքնությունը, ուր մենք կապրենք առանց կեղծիքի ու ստի, անամոթ պոպուլիզմի, կապրենք արժանապատիվ կյանքով։ Կզարգանանք՝ չզիջելով մեր ամենամեծ ու նշանակալի ազգային նվաճումը՝ մեր Հաղթանակը։ Սիրելի բարեկամներ Վստահ եմ, որ նորաստեղծ Ազատության հանձնախումբը կարող է դառնալ այն կառույցը, որը կմիավորի ոչ թե մեկ մարդու ազատության համար պայքարող մարդկանց, այլ բոլոր նրանց, ում համար թանկ է Հայաստանի և Արցախի ապահով ու բարեկեցիկ ապագան։ Սկսվում է քաղաքական պայքարի նոր փուլ, և ես հաջողություն եմ մաղթում բոլորիս այդ պայքարում։ Համոզված եմ, որ ամեն ինչ լավ է լինելու»:

  • Արմեն Սարգսյանը հանդիպել է ԱԺ նախագահ Արարատ Միրզոյանի հետ

    Հանրապետության նախագահ Արմեն Սարգսյանն այսօր հանդիպում է ունեցել ՀՀ Ազգային ժողովի նախագահ Արարատ Միրզոյանի հետ: Նախագահ Սարգսյանն ու ԱԺ նախագահը քննարկել են նախագահական և խորհրդարանական ինստիտուտների միջև առավել սերտ համագործակցության հաստատմանը վերաբերող հարցեր: Զրուցակիցներն անդրադարձել են նաև տարվա ընթացքում խորհրդարանի օրենսդրական գործունեությանը, ինչպես նաև խորհրդարանական դիվանագիտության դերին: Նախագահ Սարգսյանը տեղեկություններ է ներկայացրել նաև նախագահական մի շարք նախաձեռնությունների և գալիք տարի Հայաստանում նախատեսվող միջազգային խոշոր միջոցառումների մասին՝ կարևորելով բոլոր այս նախաձեռնություններում խորհրդարանի ակտիվ ներգրավվածությունը։

  • Ողբերգական դեպք Լոռու մարզում. բնակարանում հայտնաբերվել են ամուսինների և նրանց երեխաների դիերը

    Քիչ առաջ դաժան ու ողբերգական դեպք է տեղի ունեցել Լոռու մարզում։ Shamshyan.com-ի հաղորդմամբ՝ ժամը 13:20-ի սահմաններում ոստիկանության Թումանյանի բաժին ահազանգ է ստացվել քաղաքացիների կողմից, որ Ալավերդի քաղաքի 2-րդ զանգվածի 2-րդ շենքի բնակարաններից մեկի տան դուռը բացելով, ներսում հայտնաբերել են ընտանիքի անդամների դիերը: Ոստիկաններն ու քննիչները տան հյուրասենյակում՝ հատակին, հայտնաբերել են ամուսինների և երեխաներից մեկի, իսկ ննջասենյակում՝ մյուս երեխայի դիերը: Թե ինչն է եղել ընտանիքի անդամների մահվան պատճառը, պարզ կլինի մի շարք փորձաքննություններ նշանակելուց հետո: Ոստիկանությունն ու քննչական բաժինը պարզում են մահացածների ինքնությունն ու դեպքի հանգամանքները:

  • Հայաստանի հետ սահմանի ճշգրտման հարցը պետք է լուծվի. Վրաստանի նախագահ

    Վրաստանի նախագահ Սալոմե Զուրաբիշվիլին հայտարարել է, որ իր երկիրը պետք է Հայաստանի ու Ադրբեջանի հետ սահմանային հարցերը լուծի, հստակեցնի սահմանները, որ կայանա իբրև պետություն: Այս մասին հայտնում է Rusarminfo-ն: Զուրաբիշվիլին հիշեցրել է սահմանային այն հատվածների մասին, որոնց հարցում Հայաստանի ու Ադրբեջանի հետ համաձայնություն չկա՝ նշելով, որ սահմանազատման գործընթացն ընդհատվել է: «Անհասկանալի է, թե ինչու պետք է այդ գործընթացը չավարտենք մեր բարեկամ երկրների հետ: Մեր հանձնաժողովները պետք է սկսեն աշխատել այդ ուղղությամբ»,- ասել է Վրաստանի նախագահը: Զուրաբիշվիլին հավելել է, որ այդ գործընթացի արդյունքը կլինի համաձայնեցված սահմանը, և սա Վրաստանի համար պարտադիր փուլ է:

  • «Կենտրոն» ՀԸ-ի լրագրողի մասնագիտական գործունեությունը խոչընդոտելու դեպքի առթիվ հարուցվել է քրգործ

    «Կենտրոն» հեռուստաընկերության լրագրողի և օպերատորի մասնագիտական օրինական գործունեությունը խոչընդոտելու, նրանց քաշքշելու, տեսանկարահանման իրականացմանը խանգարելու, տեսախցիկի լուսավորության սարքավորումը վնասելու դեպքի առթիվ քրեական գործ է հարուցվել: Այս մասին ֆեյսբուքյան իր էջում գրառում է կատարել ՀՀ գլխավոր դատախազի խորհրդական Գոռ Աբրահամյանը: ««Կենտրոն» հեռուստաընկերության «Էպիկենտրոն» լրատվական ծրագրի լրագրող Արթուր Հակոբյանի կողմից տրված հաղորդման հիման վրա ՀՀ ոստիկանության Մասիսի բաժնում նախապատրաստված նյութերով 2019 թ. դեկտեմբերի 24-ին Արարատի մարզի Հովտաշատ գյուղի ձկնաբուծարանում ծավալվող իրադարձությունները նկարահանելիս և լուսաբանելիս անծանոթ անձանց կողմից նրա և նույն հեռուստաընկերության օպերատոր Սիմիկ Մայիլյանի լրագրողի մասնագիտական օրինական գործունեությանը խոչընդոտելու, նրանց քաշքշելու, տեսանկարահանման իրականացմանը խանգարելու, տեսախցիկի լուսավորության սարքավորումը վնասելու դեպքի առթիվ, ՀՀ Արարատի մարզի դատախազի հանձնարարությամբ ՀՀ Քրեական օրենսգրքի 164-րդ հոդվածի 1-ին մասի հատկանիշներով հարուցվել է քրեական գործ»,- գրել է Գոռ Աբրահամյանը:

  • Երեխաները ունեն մեծ ապագա և մեր բոլորի ուշադրության կարիքը. Արմեն Սարգսյան

    ՀՀ նախագահ Արմեն Սարգսյանը Instagram-ում երեխաների հետ լուսանկար է հրապարակել, որին կից գրել է. «Բոլոր երեխաները տաղանդավոր են, նրանք մեծ ապագա ունեն և մեր բոլորի ուշադրության կարիքը»:

  • 80 մլն դրամի խախտումներ Վայքի համայնքապետարանում

    ՀՀ պետական վերահսկողական ծառայությունը Վայոց ձորի մարզի Վայքի համայնքապետարանում իրականացրել է ուսումնասիրություն և մշտադիտարկում պետական միջոց տրամադրելու համար հիմք հանդիսացող տեղեկատվության արժանահավատության և գնումների գործընթացը կանոնակարգող օրենսդրության պահանջների պահպանման նկատմամբ: Արդյունքում արձանագրվել են 80 մլն դրամի տարբեր բնույթի խախտումներ և թերություններ։ Մասնավորապես՝ 2016-2019թթ. ընթացքում համայնքապետարանի կողմից հարկերի և տուրքերի հավաքագրման գործընթացում արձանագրվել են չգանձված (չհավաքագրված) կամ պակաս գանձված հարկեր և տուրքեր։ Համայնքապետարանի կողմից 2016-2019թթ. ընթացքում օտարված որոշ հողատարածքների և գույքի աճուրդներին այլ մասնակիցների առկայությունը կրել է ձևական բնույթ: Տրանսպորտային միջոցի վարձակալության պայմանագրի շրջանակներում ՀՀ պետական բյուջե պակաս է վճարվել եկամտային հարկի գումար: 2017-2018թթ. ընթացքում համայնքապետարանի կողմից ձեռք բերված ավտոպահեստամասերի ծախսման ճշտության ուսումնասիրությամբ արձանագրվել են չհիմնավորված ծախսեր: Համայնքապետարանի և ՀՈԱԿ-ների մի շարք աշխատակիցներ բացակայել են Հայաստանի Հանրապետությունից, սակայն այդ ընթացքում նրանց համար հաշվարկվել և վճարվել են աշխատավարձեր։ 2016-2019թթ. համայնքապետարանի, ինչպես նաև իրականացված այլ ծրագրի շրջանակներում շինարարական աշխատանքների ուսումնասիրություններով արձանագրվել են փաստացի պակաս կատարված շինարարական-վերանորոգման աշխատանքներ: Համայնքապետարանն իր կարիքների համար 2016-2019թթ. ընթացքում կազմակերպել է գնման ընթացակարգեր՝ խախտելով գնումների մասին ՀՀ օրենսդրության պահանջները: Կազմված տեղեկանքն ուղարկվել է ՀՀ գլխավոր դատախազություն:

  • Զոհրաբ Մնացականյանը մասնակցեց Արևելյան գործընկերության ԱԳ նախարարների հանդիպմանը

    ԵԱՀԿ 26-րդ նախարարական խորհրդաժողովի շրջանակներում ԱԳ նախարար Զոհրաբ Մնացականյանը դեկտեմբերի 4-ին Բրատիսլավայում մասնակցեց Եվրոպական միության արտաքին գործերի և անվտանգության քաղաքականության հարցերով նորանշանակ բարձր ներկայացուցիչ, Եվրոպական հանձնաժողովի փոխնախագահ Ջոզեֆ Բորելի և ԵՄ Արևելյան գործընկերության մասնակից պետությունների ԱԳ նախարարների հանդիպմանը: Հայաստանի արտաքին քաղաքական գերատեսչության ղեկավարը շնորհավորեց Ջոզեֆ Բորելին պատասխանատու պաշտոնում նշանակվելու և Կազմակերպության կարևոր ուղղությունների համակարգման ղեկը ստանձնելու կապակցությամբ՝ հաջողություն մաղթելով այդ կարևոր առաքելությունում: Հայաստանի ԱԳ նախարարը, կարևորելով Արևելյան գործընկերության ծրագրի նախաձեռնությունը՝ որպես ԵՄ հետ երկկողմ համագործակցության զարգացման կարևոր հարթակ, որը ժողովրդավարության և մարդու իրավունքների արժեքների վրա խարսխված փոխգործակցությունն է ձևավորել եվրոպական գործընկերների միջև: Զոհրաբ Մնացականյանը ներկայացրեց ժողովրդի լայն մանդատի հիման վրա կառավարության կողմից իրականացվող լայնամասշտաբ բարեփոխումների ընթացքն՝ ուղղված երկրում իրավունքի գերակայության, մարդու իրավունքների, ժողովրդավարության ամրապնդմանը և կայուն զարգացմանը, դատաիրավական համակարգում բարեփոխումների իրականացմանը։ Հայաստանը վերահաստատեց իր պատրաստակամությունը՝ շարունակելու գործնական քայլեր ձեռնարկել ԵՄ հետ փոխադարձ հարգանքի և շահերի վրա հիմնված հարաբերությունների զարգացման ուղղությամբ: Այդ համատեքստում ընդգծվեց Հայաստան-Եվրոպական միություն երկկողմ համագործակցության ոլորտը կարգավորող իրավական հենքի՝ Համապարփակ և ընդլայնված գործընկերության համաձայնագրի կիրարկման կարևորությունը և մուտքի արտոնագրերի ազատականացման երկխոսության մեկնարկի էական նշանակությունը: Հանդիպման մասնակիցները մտքեր փոխանակեցին Արևելյան գործընկերության ապագայի տեսլականի շուրջ:

  • Համայնքների խոշորացման որևէ հաջողված պատմություն այդպես էլ չներկայացվեց․Ն. Զոհրաբյան

    «Հիշո՞ւմ եք, թե նախորդ խորհրդարանում ինչ արմագեդոններով կարողացավ Հանրապետական մեծամասնությունն անցկացնել համայնքների խոշորացման ռեֆորմը։ Եվ համայնքների խոշորացման որևէ հաջողված պատմություն այդպես էլ չներկայացվեց», – Ազգային ժողովում այսօր հայտարարեց ԲՀԿ-ից Նաիրա Զոհրաբյանը։ Նա ասաց, որ հիմա էլ կան դժգոհություններ խոշորացված համայնքներում։ Զոհրաբյանը նկարագրեց դրանցից մի քանիսը՝ ճանապարհների ու ենթակառուցվածքների բացակայությունը, շտապօգնության մեքենաների՝ մեծ տարածություն հաղթահարելու ստիպվածությունը և այլն։ Զոհրաբյանի խոսքով՝ չի կարելի բոլորին մեկ որոշմամբ խոշորացնել, պետք է հաշվի առնել համայնքային տարբեր կապերը, լոգիստիկան, լոգիկան և այլն։ Ինչ վերաբերում է նրան, որ համայնքների խոշորացման ժամանակ բնակավայրերում անցկացվող հանրաքվեներն իրավական արժեք չեն ունենալու, դա, ըստ Զոհրաբյանի, անարգանք է այդ համայնքների բնակիչների հանդեպ։

  • Ես ներում եմ բոլոր նրանց, ում պատճառով խլվեց իմ իրավունքը․ Սեպուհ արքեպիսկոպոս Չուլջյան

    Հայ Առաքելական եկեղեցու Գուգարաց թեմի առաջնորդ Սեպուհ արքեպիսկոպոս Չուլջյանը հայտարարությամբ է հանդես եկել Կ. Պոլսի 85-րդ պատրիարքի ընտրության առնչությամբ: Ermenihaber-ը ներկայացնում է հայտարարության տեքստն ամբողջությամբ․ «Թուրքիո հայ հավատավոր ժողովրդին «Քարերը կտրելու (թափելու) ժամանակը և քարերը հավաքելու ժամանակը» ( Ժող. 3:5) Հոգելույս Մեսրոպ արքեպիսկոպոս Մութաֆյանի հիվանդությամբ սկսված և տարիներ տևած ընտրական գործընթացը, ցավոք, բազմաթիվ խնդիրների, բաժանարար գծերի, նեղ, շահադիտական հավակնությունների գերադասման և համայնքային շահի ոտնահարման դրսևորումների պատճառ դարձավ: Այդ մասին անցնող տարիներին եղել են բազմաթիվ անդրադարձներ: Սակայն տարիներ տևած թնջուկը` պատրիարքի ընտրությունը, ավա՜ղ, չստացավ սպասված հանգուցալուծում և փոփոխված կանոնադրությունը համայնքին բերեց ոչ թե հույս, այլ հասցրեց ևս մի նոր հուսախաբության: Այլևս բացարձակ ճշմարտություն է, որ «կանոնադրական փոփոխության» ծրագրավորված բեմադրության իրական պատճառը հիմնականում իմ անձն էր, քանի որ ընտրություններում Թուրքիայի հավատավոր հայ ժողովրդի մի ստվար հատվածի աջակցությունն ինձ անկասկած որոշիչ կարող էր լինել: Եվ այս բեմականացման հանցավոր հեղինակները բոլորին հայտնի մի քանի գավառամիտ կղերականերն ու մի քանի նեղմիտ աշխարհականներն են, ովքեր փորձեցին ստվեր գցել պոլսահայ պատվարժան ժողովրդի անվանը: Նրանք էին, որ օգտվելով անպատժելիության, անօրինականության և թողտվության մթնոլորտից, գերաշնորհ Գարեգին արք. Բեկչյանին իբրև ընտրյալ տեղապահ Պատրիարքարանից անօրինաբար դուրս թողնելով՝ հող նախապատրաստեցին հիշյալ դավադիր փոփոխությունը կանոնադրության մեջ կատարելու և Պատրիարքարանի դուռն իմ և մյուս եպիսկոպոսների առջև գոցելու համար: Տեղի ունեցածը պատմական աղաղակող անարդարություն էր Պոլսո համայնքի ոչ միայն ներկա այլև գալիք սերունդների նկատմամբ: Ինչպես ասում է Երեմիա մարգարեն. «Հարքն ազոխ կերան եւ որդւոց ատամունք առին» (Երեմ:, ԼԱ, 29): Պատրիարքի թեկնածու իմ սրբազան եղբայրներն ու նախաձեռնարկ մարմինը մեր և համայնքի խնդրանքներին ու հորդորներին չանսացին և չկամեցան Թուրքիո Հայոց պատրիարքության և հավատավոր հայությանը վայել արժանապատիվ և «լայնախարիսխ» ընտրությունների նախապատրաստել: Սակայն, նրանք գերադասեցին նեղ, հիմնականում անձնական, իրավիճակային նկրտումներն ու դրանց բավարարումը, որովհետև նախապատվեցին ստեղծված գաղջ մթնոլորտի շարունակականությունը: Ստեղծվում է այնպիսի տպավորություն, որ, լինելով ներսում, նրանք, ամենայն հավանականությամբ, չեն էլ գիտակցում այդ համայնքի առողջացման դեղատոմսերի, այն է՝ կատարվելիք փոփոխությունների անհրաժեշտությունը: Ինչևէ, այսօր արդեն ունենք այն, ինչ ունենք, և այժմ «քարերը հավաքելու ժամանակն է»: Ժամանակն է համայնքի խնդիրներին նայել ոչ միայն ներսի, այլև դրսի աչքով, քանի որ արդեն երևան են եկել բազմաթիվ խնդիրներ, որոնք ներսի ուժերով միայն հնարավոր չեղավ առայսօր լուծել, և համոզված եմ, որ առաջիկայում ևս չեն լուծվելու, եթե համայնքի հոգևոր և աշխարհիկ առաջնորդները չառերեսվեն անցնող 12 տարիների անօրինականությունների և կոպտագույն սխալների հետ: Պետք է գնահատական տրվի նախորդ տարիների՝ Պատրիարքության անընդունելի ընթացքին, փաստացի թուլացմանն ու պառակտմանը և վարկանիշի կորստյան փաստին ու պատճառներին: Դիմելով Թուրքիայի իմ սիրելի հոգևոր եղբայրներին ու հավատավոր պոլսահայությանը` ուզում եմ անկեղծ խոստովանությամբ հավաստիացնել, որ պատրիարք ընտրվելուս ձգտումը պայմանավորված է եղել ոչ թե պատրիարքական աթոռին կամ առհասարակ իշխանության հասնելուu տենչով (բնավ երբեք), այլ Պոլսի Աթոռի հանդեպ տածած սիրո և ծնունդով մալաթիացուս հոգու պարտքի ու ծառայության գիտակցությամբ: Ուստի փոփոխված կանոնադրությունը չի կարողանա ինձ հեռու պահել պոլսահայության և պատրիարքության նկատմամբ իմ պարտավորություններին հավատարիմ մնալուց: Ավելին՝ հետայսու որևէ հանգամանք չի կարող խոչընդոտել այն բանին, որ ես մնամ Թուրքիայի հայ համայնքի կողքին՝ փորձելով օգնել առկա խնդիրների լուծմանը: – Թուրքիայի հայ համայնքի հավատավոր ժողովուրդ, լինելով հայ եկեղեցու հոգևոր առաջնորդներից մեկը և ելնելով ազգի առջև պատասխանատվության բարձր գիտակցությունից՝ ես, շնորհակալություն հայտնելով իմ կողմնակիցներին և տուրք չտալով գայթակղություններին, կոչ եմ անում հանուն համայնքի խաղաղության և բնականոն մթնոլորտի հաստատման, հանուն Հայոց պատրիարքության բարգավաճման՝ գնալ ընտրությունների և ընտրել 12 եպիսկոպոսներից որևէ մեկին՝ ձեր պատրիարքին: Նախապայման չէ, թե ձեր թեկնածուն Պոլսից է, թե Պոլսից դուրս: Այս կերպ միայն հնարավոր է վերականգնել համայնքի վիրավորված արժանապատվությունն ու իրավունքը: Անշուշտ ամեն մարդ ընտրության մեջ ազատ է: Պատրիարքի թեկնածու իմ Սրբազան եղբայրներին դարձյալ կոչ եմ անում առաջնորդվել միասնականության, քրիստոնեական սիրո և համայնքային շահի կարևորման տրամաբանությամբ և գիտակցել, որ անձնական շահերին գերակայություն տալու, համայնքի ցանկությանը հակառակ արված քայլերի հավաքական պատասխանը այն անառողջ, պառակտված վիճակն է, որ ներկայումս կա համայնքում: Նա, ով կընտրվի պատրիարք, պետք է անդուլ ջանք թափի՝ վայելելու աշխարհով մեկ սփռված թուրքահայության սերն ու ակնածանքը, դառնալու նրանց բոլորի ազգընտիր առաջնորդը, հուսալի պատրիարքը և խնամարկու հայրը: Հույս ունեմ, որ ընտրյալ պատրիարքը ականջալուր կլինի իմ և ինձ նմանների անհանգստությունից, մտահոգությունից և ավելի լավը տեսնելու ցանկությունից բխող խորհուրդներին, հորդորներին ու նկատառումներին: Առաջնորդվելով քրիստոնեական ներողամտությամբ` ես ներում եմ բոլոր նրանց, ում պատճառով խլվեց իմ իրավունքը: Թող Աստված լինի բոլորիս դատավորը: Մնացեք խաղաղությամբ: Օրհնությամբ՝ Սեպուհ արքեպիսկոպոս Չուլջյան Առաջնորդ Գուգարաց թեմի»

  • Գևորգ Կոստանյանը Մարտի 1-ի գործով մեղադրյալ է ներգրավվել 5 հոդվածներով. ՀՔԾ պարզաբանումը

    Նախկին գլխավոր դատախազ Գևորգ Կոստանյանը Մարտի 1-ի գործով մեղադրյալ է ներգրավվել միանգամից 5 հոդվածով։ Այս մասին «Ազատության» հարցմանն ի պատասխան տեղեկացրել են Հատուկ քննչական ծառայությունից (ՀՔԾ)։ Մասնավորապես, նախկին պաշտոնյան մեղադրյալ է ներգրավվել պաշտոնեական կեղծիք կատարելու (Քրեական օրենսգրքի 314-րդ հոդվածի 1-ին մասով), պաշտոնեական լիազորությունները չարաշահելուն դրդելու ( 38-308-րդ հոդվածի 2-րդ մասով), պաշտոնեական կեղծիք կատարելուն դրդելու (38-314-րդ հոդվածի 1-ին մասով), ծանր կամ առանձնապես ծանր հանցագործությունը պարտակելուն դրդելու (38-334-րդ հոդվածի 1-ին մասով), ծանր կամ առանձնապես ծանր հանցագործությունների վերաբերյալ գործերով ապացույցների կեղծմանը դրդելու (38-349-րդ հոդվածի 3-րդ մասի 1-ին կետով) հոդվածներով։

Լրահոս
Առաջինը Հայաստանում. Մաշկը երիտասարդացնող ուղղահայաց կոլագենային սոլյարի
3 արդյունավետ բաղադրատոմս երիկամները մաքրելու համար
Հենրիխ Մխիթարյանի զբոսանքը որդու հետ Երևանի կենտրոնում
Լիլի Սարգսյանը՝ 20-ամյակի անակնկալների և Դուբայում բերման ենթարկվելու մասին
«Կինստագրամ»-ից Դիանա Տոռեսի ձեռքբերումներն ու երկրպագուների արձագանքը
Այսօր «Երեմյան Փրոջեքթս» ընկերության գլխավոր տնօրեն Դավիթ Երեմյանի տարեդարձն է:
1 Շաբաթում 5 կգ նիհարելու համար հիանալի միջոց:
Աննա Հակոբյանն ու Արտակ Բեգլարյանը քննարկել են մի շարք համագործակցության հարցեր
Ամերիկացի միլիարդատերերը 434 միլիարդ դոլարով հարստացել են համավարակի ֆոնին
Չինաստանում ոստիկանությունը տղամարդու բեռնատարից մոտ կես միլիոն դոլար արժողությամբ ավելի քան 100 սառեցված կրիա է առգրավել
հուլիսի 1-ից Վրաստանը կսկսի զբոսաշրջիկներ ընդունել հիմնականում այն երկրներից, որտեղ կորոնավիրուսի տարածվածության մակարդակը ցածր է
Նարինե Աղբալյանը պաշտոնավարման ավարտի կապակցությամբ ուղերձ է հղել
Աննա Հակոբյանը՝ Արցախում. Ես եւ բազմաթիվ կանայք, պատրաստ են զենք վերցնել իրենց հայրենիքը եւ երեխաներին պաշտպանելու.
Դիմակ կրելիս Ինչպե՞ս պաշտպանել դեմքի մաշկը.
Ե՞րբ կմեկնարկի Տոկիոյի Օլիմպիական Խաղերը.
Խմբագրի ընտրանի

Առաջինը Հայաստանում. Մաշկը երիտասարդացնող ուղղահայաց կոլագենային սոլյարի

Կոլլագենային սոլյարին թույլ է տալիս ստանալ գերազանց արևայրուք և փայլ, միաժամանակ երիտասարդացնելով մաշկը: Կոլլագենային RUBINO սոլյ... Դիտել ավելին

Տեսանյութ

Ֆրանսիայի շնորհակալությունը բժիշկներին

Փարիզում բժիշկներին երախտագիտություն հայտնելու յուրահատուկ ձև են գտել: Երեկոյան 10 րեպեով վառվել են էյֆելյան աշտարակի լույսերը: Աշտարակի վրա լուսային էֆեկտներով գրված է եղել «շնորհակալություն»:.... Դիտել ավելին

Մամուլի բաժին
Ուղիղ   խոսք